Barbie movie hlawhtlinna lawmna pualin Mattel-in Weird Barbie doll siam thar

Barbie doll siamtu, Mattel company chuan an toy behchhana siam, 'Barbie' movie-in khawvel huapa hlawhtlinna nasa tak a tawn mek lawmna ni pah fawmin, toy thar 'Weird Barbie' siam tharin Zirtawpni liam ta khan a pho chhuak.

Weird Barbie hi Barbie film-a Kate Mackinnon character behchhana siam a ni a, pre-order theih niin USD 50 man a ni. Nakkum May 31 hmain an thawn chhuah theih beisei a ni. An doll siam thar hi Barbie doll dangte ang lo takin a sam a tawi a, a hmelah pawh hun nuam leh hlimawm tak hmang hmel puttir a ni bawk. Movie-a Mackinnon mizia ang lantir theih dan tur bera duan a ni

Margot Robbie leh Ryan Ghosling-te channa, July 21-a tlangzarh, Barbie movie hi a kar thumnaah pawh a la hit chho zel a, theatre hrang hrangah chhuah chhunzawm zel a la ni. Khawvel puma a sum lak luh hi USD mtd 900 tling tawhin, vawiinah global box office-ah USD tluklehdingawn a la lut pha tawh tura ngaih a ni.

Director Greta Gerwig hian he film avang hian record a siam chho mek bawk. Hmeichhe direct zingah Barbie hi tlangzarh kara sum la lut hnem ber a ni tawh a, USD tld a lak luh theih chuan hmeichhe director zinga hetiang dinhmun thleng thei hmasa ber a ni leh bawk ang.

Barbie movie hi streaming app lamah pawh dah tum a ni a, mahse, nghah ve deuh erawh a la ngai ang. Warner Bros. Discovery CEO David Zaslav chuan movie hi a theih anga theatre lamah tihchhuah chhunzawm phawt a ni ang a, hemi hnu hian streaming service, Max-ah dah a ni dawn tih a sawi a, a hun erawh a la sawi thei lo. Favang chhoah erawh an dah hman a rinawm.