Lersia Play-in ngenna siam

Mizo streaming app, Lersia Play chuan an movie tihchhuahte lo record a, social media lama lo inthawn ṭhin tam tak an awm thu sawiin, heng hi dan phal loh thil a ni a, ti tawh lo turin an ngen. Hetianga lo tite chu Copyright Law 1957 hmanga hrem theih an ni a, kum 2 lung ina tan leh cheng nuai 2 chawi thei an ni tih a sawi.

Lersia Play-ah hian record tur a theih chin chinah ven a nih rual hian ven sen vek a ni lo a, mahse, a lo record tute man chhuah theihna turin app hi siam a ni thung.

Tun hnaia Lersia play movie leakout record tute hi man chhuah an ni zel a, a theh darhtute hriat theih chinte chu legal notice pek an ni a, civil case siamin court-ah kalpui zel an tum.

Film siamna atan hian hun leh tha, sum leh pai tam tak sen a ngai ṭhin. Mipuite pawhin hei hi kan hriatpui a, dan phal loha an film lo record leh lo thawndarhtu nih loh ṭheuh kan tum a ṭha hle.

Lersia Play-ah hian film chhuak thar tur hmachhawp a awm nual a, chung zinga ṭhenkhat chu -

August 11 - Thaibawih (Hmeichhe lu chu mipa)

August 25 - The Ghost Hunter

September 8 - Dear Kim

September 23 - Rawng Chawhpawlh