Khiangte Construction Ṭhazual Gospel : Pakhatnaah Thawhlehnaniropuia

Khiangte Construction Ṭhazual Gospel chart tharah, Mizo Idol 2015 neih ṭuma kum naupangtea rawn lar chhuak, zaithiam tak mai Thawhlehnaniropuia chuan a hla, 'Nihna' hmangin pakhatna dinhmun a rawn hauh.

'Nihna' hi Kimkima phuah a ni a, dam lai hringnuna thlemna leh buaina karah, hmangaihtu Pathianah chauh chatuan hlimna a awm tih tarlanna niin, a hla thu a ṭhain a thluk a mawi a, a satuin a thiam bawk nen, ngaihthlak a la hlawh chhoh zel ngei ang. Puipuia hian a music video hi June 17 khan a tichhuak a, music leh recording hi Thangbawiha (EME Records) kutchhuak a ni a, video hi BS Pictures siam a ni thung.

Chart hmasaa palina aṭangin Amtea 'Ka la hlim dawn' chu pahnihnaah a rawn chho a, ani pawh hian hma a la sawn chhoh zel a rinawm. Arini 'Isu Ka hmangaih che' pawh pathumnaah a rawn chho bawk a, Mizo Idol hlui, Jerry Elaro 'I hnen ka lo pan e' leh, Tluangtluangi ' I ropui zia' chu top 5-ah an lang bawk.

Ṭhazual Gospel Top 10-ah hian zaithiam rawn comeback ropui tak, Nancy Zothanmawii chuan 'Aman engkimah min hria' bakah 'Thlarau thianghlim min chenchilhtu' chu a rawn lanpui leh bawk. Zorinsanga Sailo pawh chart-ah la awm chhunzawm zelin, anni bakah Lalthansangi leh Seraphic Choir te an rawn lang thar bawk a ni.