Jamie Foxx-a'n Juda-te ngaihdam a dil

Hollywood actor, Jamie Foxx chuan social media-a Juda-te huatna lam rawng kai a post avanga sawisel a tawh hnuah, a post hi delete in Juda-te chungah ngaihdam a dil leh nghal.

Oscar winner hian a Instagram page-ah, "Heng mite hian Isua an tihlum a, i chungah pawh eng nge an la tih duh dawn? tiin a ziak a, #fakefriends#fakelove a dah zui bawk.

Mahse a thil post hian sawisel a tawk nasa hle a, hei vang hian delete in August 5 khan ngaihdam dilna thuchhuah a siam zui nghal. Foxx chuan, "Juda hnam leh midang, ka thu post-in a tihnat zawng zawngte chungah ngaihdam ka dil e," tiin, a ṭawngkam hman chu a ṭha lo hle tih sawiin, pawi a tih thu a sawi. A thil post pawh sawifiah zuiin, "Ka ṭhian ṭha anga langin min phatsan a ni, ka thu post-a ka sawi pawh midang ka tihna a ni lo," a ti. Juda-te chu a ngainain a thlawp reng tih a sawi zui.

Jamie Foxx thu post sawiseltu zingah hian Friends star, Jennifer Aniston pawh a tel. A IG story-ah a screenshot image dahin, 'Hetiang thil post hi tihluih emaw, tihpalh emaw pawh ni se ka haw hle a ni. Juda-te en hranna lam reng reng hi englai mahin ka thlawp lo a, inhuatna lam hawi zawnga thu post hi kan pawmzam ve thei lo," tiin a ziak.