‘Barbie’ ngamtu an la awm lo

North American box office-ah 'Barbie' ngamtu an la awm lo a, a kar thumnaah pawh roreltu a la ni chhunzawm zel. A elpui, 'Oppenheimer' erawh a tawlh hniam tawh thung.

Greta Gerwig fantasy comedy, 'Barbie' hian North America-ah USD mtd 459 a la lut tawh a, khawvel puma a sum lak luh hi theatre-a tihchhuah a nih aṭanga ni 17-ah USD tld 1 a tling tawh. Hmeichhe direct movie zingah hetiang dinhmun thleng thei hmasa ber a ni. Warner Bros. film tihchhuah tawh zingah USD tld 1 hmu chhuak rang ber a ni a, hemi hmaa record lo siam tawh, ni 19 chhunga USD tld 1 hmu chhuak thei 'Harry Potter and the Deathly Hallows : Part 2' a rawn khum a ni.

Newcomer, The Meg sequel chuan 'Oppenheimer' nek chhuakin no. 2 dinhmun a rawn hauh. Jason Statham channa, action/adventure 'Meg 2: The Trench' hi North America-a theatre 3,503-ah tihchhuah a ni a, USD mtd 30 a la lut. Kum 2018-a tihchhuah a movie hmasa, tlangzarh kara USD mtd 45 la lut thei erawh a pha lo viau. USD mtd 130 budget movie hi international lamah erawh a che ṭha tha thung a, USD mtd 112 a la lut thei.

'Oppenheimer' chuan USD mtd 28.7 lak luh belh lehin, no. 3-ah a awm. J Robert Oppenheimer biopic hi R-rated film zigah kumina sum la lut hnem ber ni tawhin, khawvel puma a sum lak luh hi USD mtd 500 a tling tawh a, World War II movie zinga che ṭha ber a ni bawk. Biographical film siam tawh zingah USD mtd 500 la lut thei pali zingah a tel a, a dangte chu “Bohemian Rhapsody,” “The Passion of the Christ” leh “American Sniper” te an ni.

Film chhuak thar dang,"Teenage Mutant Ninja Turtles: Mutant Mayhem" chu no. 4-ah a rawn lang a, tlangzarh karah USD mtd 28 a hmu chhuak. He film-a aw thawhtu zingah hian Jackie Chan, Ice Cube, Paul Rudd, Ayo Edebiri leh Seth Rogen-te an tel. Top 5 chu supernatural horror comedy, 'Haunted Mission' in a rawn khar a ni.