VDC-in YouTube superstar MrBeast a khing

Khawvela YouTube star lian ber, subscribet mtd 174 zet nei, Jimmy Donaldson aka MrBeast chu a virtual restaurant chain, MrBeast Burger enkawltu, Virtual Dining Concepts (VDC) chuan an contract siam zawm lo leh zah lohah puhin a khing let .

VDC hian New York court-ah MrBeast khinna hi theh lutin, an inremna a zawm loh avanga a thil tihchhiat hi USD mtd 100 hu zet a tling tih a sawi.

Donaldson hian a hmain VDC leh a parent company chu a lo khing tawh a,restaurant chain nena inremna an siam tihtawp a phut. An burger siam chu 'tui lo lutuk' leh 'ei tlak loh' tia sawiin, a hming an tichhia niin a puh. VDC hian hei hi chhangin, YouTuber chu inremna an siam palzutin, a mimal hlawkna ngawt ngaihtuaha inremna dang siampui tumah a puh let ve thung.

MrBeast Burger brand hi kum 2020, December khan an tlangzarh a, khawvela ram hrang hranga hmun 1,700-ah an inzarh pharh tawh.