Eminem laka Melle Mel diss track siamin sawisel hlawh

'Step Off' spitter, Melle Mel chuan Eminem a chhan letna, diss track chu August 8 khan a tichhuak a, mahse, fakna aiin sawiselna a tawng nasa zawk a, 'worst diss track' tia sawite an awm.

Mel hian hip-hop lama Eminem hlawhtlinna chhan hi a vun rawng vang mai nia a lo sawi avangin an pahnih inkar boruak hi a ṭha lo chho a ni. March thlaa 'The Art of Dialogue' in an kawmnaah, Melle chuan Eminem chu mihang ni ve se, hetiang dinhmun hi a thleng lo ang, a ti. "Mihang ni se hip-hop artist top 5 zingah pawh a tel pha lo ang, mingo a nih vang mai a ni," tiin a sawi a ni.

Eminem hian August 5-a rapper Ez Mil nena an thawh dunna single, Realest an tihchhuahah Mel thusawi hi a rawn chhang a, hemi hnu August 8 khan Mel hian diss track, "Melle Mel's Response to Eminem's Latest Diss" tih chu a tichhuak zui ve nghal a, mahse, a hit pui ta lem lo a ni.