Mizo Film Award 2023 sem hun tur a hriat ta

Mizo Film Award 2023 sem hun tur chu tihchian a ni ta a, September 29, Zirtawpni zanah sem a ni dawn.

Award sem hi mipui tam zawkin an chhim theih turin Vanapa Hall-ah neih a ni dawn a, ticket pawh siam tum a ni bawk.

Mizo Film Award 2023 atan hian inbuatsaihna pawh ngawrh taka kalpui mek zel niin, August thla chhungin nomination peih fel hman beisei a ni.

Eng chin nge a huam?

Mizo Film Award hi Tlau Entertainment buatsaihin December 2021 khan sem a lo ni tawh a, ṭun tum award sem tur hian hemi hnu lama film chhuakte a huam ang. December 2021 leh August 2023 inkara Mizo film chhuak zawng zawngte a huam thei dawn a ni.

Mizo film hi kum khat chhungin 20 bawr vel zet a chhuak ve tawh a, kawng hrang hrangin hmasawnna a thleng mek zel.

A ngaihnawm dawn!

December 2021 aṭanga December 2022 inkar khan Mizo film hi 30 vel zet a chhuak a, kuminah pawh film eng emaw zat a chhuah belh leh tawh bawk. Heng zing aṭang hian a tha ber ber thlan chhuah a ni dawn a, a ngaihnawm dawn.

Film ṭhenkhatte chu hit tak tak, a changtute pawh milar 'celeb' kan tih zinga chhiar nghal theih khawpa hriat hlawh phahte an ni nawk. Hetih lai hian hriat hlawh zui lem lo, mipui pawhin an en viau loh film-te pawh a awm ve bawk.

Mizo film chhuak thar tam zawk chu mipuiin kan ngaihven leh man chawi pawha kan lei ngamte an ni hlawm a, chawimawina dawn phu tak tak an ni. Mizo Film Award 2023 sem turah pawh film chhuak a tam avangin award dawn a harsa dawn a, hei hi a tihlu zualtu a ni ngei ang.