Science & Environment : Universe-a arsi hla ber thlalak pho chhuak

Universe-a arsi hmuh chhuah tawh zinga hla ber thla chu James Webb Space Telescope chuan la fuhin, NASA chuan Ningani khan he thalak hi a rawn pho chhuak.

He star hi Hubble Space Telescope hmanga nikuma hmuh chhuah a ni a, a hmingah Earendel an vuah. Sunrise Arc galaxy-ah awmin hei hi light year tld 19.2 vela hla a ni. He arsi hi Ni (Sun) aiin a let hnihin a sa zawk a, a let maktaduaiin a eng zawk bawk. Ni (Sun) sat zawng hi 5,500 degrees Celsius a ni.

'Earandel' tih hi 'The Hobbit' prequel leh, 'Lord of the Rings' trilogy, J.R.R Tolkien 'The Silmarillion'-a charactor pakhat hming chawia an phuah a ni.

James Webb Space Telescope hi US space agency NASA , European leh Canadian space agency-ten USD tld 10 senga an siam a ni a, kum 2021 Krismas ni khan universe inlumlet dante zirchian turin thengrengah kah chhuah a ni. A thlalak rawn thawn hrang hrang hmang hian astronomer-te chuan solar system chungchang thuk zawkin an zir theih phah a ni.

NASA chuan Webb telescope hian Hubble Space Telescope-in universe-a star hla ber a lo hmuhchhuah tawh an instrument-in a man phak loha hlaa a awm tawh avangin, Webb telescope chauh hian a hmu fuh thei tawh tih an sawi.