Kuminah Emmy Awards sem dawn lo

American leh international television industry lama chawimawina ngaihhlut, Emmy Awards sem ṭhin chu Hollywood actor leh writer-te nawrh huaihawt mek avangin kuminah sem chhuah theih a ni dawn ta lo.

Organiser-te chuan Ningani khan kumin September thlaa sem tura lo ruahman tawh, 75th Emmy Awards chu thla liin sawn hlat a nih thu leh, nakkum January 15-ah sem a nih tur thu an puang.

Emmys sem hun tihkhawtlai a nih hnuhnun ber chu kum 2001 kha niin, 9/11 twin attack vangin sawn hlat a lo ni tawh a ni.

Nawrh huaihawt chhung chuan Hollywood A-list star leh nominee-te chu Emmys-ah hian an inlan phalsak an ni lo a, writer-te pawh host leh presenter-te thusawi turte an ziah phalsak an ni lo bawk. Hei vang hian anni tel lo chuan Emmy Awards pawh hi a kalpui theih dawn lo a, sawn hlat a ni ta a ni.