Mizorama a vawi khatna tur Punk 101 Skate Jam buatsaih dawn

Mizoram State Sports Council leh bbyanimals thawk dun chuan, August 15 hian Independence Day lawmna peng pakhat atan, Mizorama skateboarding competition hmasa ber tur, Punk 101 Skate Jam an buatsaih dawn.

Folkland Park, Falkland-ah August 15 chawhnu 2-ah ṭan a ni dawn a, intihsiakna chi hnih, Game of Skate leh Best Trick Contest a awm ang. Game of Skate-a pakhatna hian Rs 5,000, skateboard deck, griptape leh accessories a dawng dawn a, pahnihnain Rs 3,000, bearings, griptape, accessories leh pathumnain Rs 2,000, wheels leh accessories a dawng bawk ang. Best Trick Contest-a pakhatna hian Rs 5,000, skateboard deck, griptape, mz skatewax, accessories a dawng dawn bawk a ni. Skateboarding competition ,Mizoramah chauh ni lo, hmarchhak bialah pawh buatsaih a nih hmasakna ber tur a ni bawk.

A thawh hnihna hi zan lamah Thara Resort-ah concert nen chhunzawm a ni ang. Zan dar 7-ah ṭanin, Avora Records, Be Run Over, Angel From My Nightmare, Veracity leh Hottips -te an che ang. A hmunah hian food stall siam a ni nghal dawn a, he hun atan hian merch partner chu The Shoerack niin, sound partner chu audioverse, food partner Silver Spoon, stall partner Zothan Closet leh logistics partner Out Buster-te an ni.