Khiangte Construction Ṭhazual Lengzem: Mary Dawngi'n ‘Chhingkhualah’ a rawn lanpui ta

Khiangte Construction Ṭhazual Lengzem chart tharah Mary Dawngi chuan a hla, 'Chhingkhualah' tih chu pakhatna a rawn nihpui ta.

'Chhingkhualah' tih hi hun eng emaw chen chart-ah hian lang tawhin, hma a rawn sawn chho zel. Chart hmasaah pahnihnaah awmin, tun ṭumah hian a chung ber dinhmun a rawn luah thei ta a ni.

Mary Dawngi hian June 9 khan 'Chhingkhualah' hi YouTube lamah tichhuakin, he hla hi Henz phuah a ni. Music, mixing leh recording hi Randy Zaitea (Vulmawi Studio) siam niin, videography hi Simon Pa Sang (Ps Production) kutchhuak a ni thung. A hla a mawiin ngaihthlak a nuam a, a satuin a thiamin a aw dangdai tak nen a inmil hle. A video a hmuhnawm bawk nen, thlir leh ngaihthlak a la hlawh chhunzawm hle ngei ang.

Mizo Idol aṭanga rawn invawrh chhuak, David Darlong 'Min tiam rawh' pawhin hma lam pan zelin, pahnihnaah a rawn lang. A hla dang, 'Lo kir hram rawh' tih chu no. 8-ah a rawn lang thar bawk a ni. Zaii Hauchhum chuan ama hla phuah ngei, 'Kar hla ṭhin mahse' tih chu pathumna a rawn nihpui a, Jenny Jathang 'Vengtu Angel' leh Siamsiami Pachuau 'Ka ṭangah bei la' te pawh Top 5-ah an lang bawk.

Various Artists 'Zo-Fate Lal Ram' pawh chart-ah a la cham chhunzawm zel. Hetih lai hian Angela Malsawmpari, Marina Vanhriatpuii Varte leh Saka-te chu chart-ah an rawn lang thar a ni.