Box Office-ah 'Barbie' ala chungnung zel

North America box office-ah 'Barbie' dinhmun luahlan thei an la awm lo fo. A kar lina atan dinhmun sang ber a chelh chhunzawm leh ta.

Warner Bros blockbuster hian record siam thar lehin, August 11-13 box office-ah USD mtd 33.7 a lak luh belh leh. Kar li chhung hian North America-ah USD mtd 526.3 a la lut tawh a, international-ah USD mdt 657 la lut bawkin, a sum lak luh hi USD tld 1.18 a tling tawh. "Harry Potter and the Deathly Hallows: Part 2" dawtah Warners film zinga sum la lut hnem ber a ni tawh a ni.

'Barbie' hi kumina film chhuak tawha sum la lut hnem ber ni thei dinhmunah a ding chho mek a, tunah hian khawvel huapa USD tld 1.358 la lut thei, The Super Mario Bros. Movie a la pha lo. Mahse theatre 4,137-ah chhuah chhunzawm a la nih avangin hei pawh hi a khum chhoh ngei a rinawm.

Oppenheimer pawh 'Meg 2' nek chhuakin pahnihnaah a rawn chho leh. Christopher Nolan-a film hian a kar linaah USD mtd 18.8 la lut lehin, dometic-a a hmuh chhuah hi USD mtd 264.3 a tling tawh.

"Teenage Mutant Ninja Turtles: Mutant Mayhem" pawh No 3-ah rawn kai chhoin, USD mtd 15.8 a hmu chhuak a, Jason Statham channa 'The Meg' sequel,"Meg 2: The Trench" chuan USD mtd 12.7 la lutin palinaah a tla thla thung. Top 5 hi newcomer, "The Last Voyage of Demeter" chuan a rawn khar a, he film hian tlangzarh karah USD mtd 6.5 a la lut a ni.