Ram pum huap lengkhawm zai intihsiak: Zaninah 'Pawh Hawn Zan' hmang dawn

Central YMA leh PHE Department ṭangkawp buatsaih, rampum huap lengkhawm zai intihsiak neih tur chu zanin hian 'Pawh Hawn Zan' hman a ni dawn.

'Pawh Hawh Zan' hi zanin dar 7:30-ah Central YMA Hall, Tuikhuahtlangah neiin, CYMA general secretary Prof. Lalnuntluanga chuan report a pe ang a, PHED Chief Engineer Er. Duhkima'n thusawi tawi a nei ang.

Zaipawl intihsiak tur chungchang inhrilhfiahna hi chief judge, Lalromawia'n a nei dawn a, hemi hnu hian CYMA President R. Lalngheta'n lengkhawm zai intihsiak neih tur hi a hawng ang. Branch hrang hrangte zai hun tur pawhna hi Sound & Music committe member Lalpiangliana leh Zosangliana te'n an buatsaih dawn a ni.

Rampum huap lengkhawm zai intihsiak turah hian YMA branch 50 in hming an pe lut a, a tam ber hi Aizawl khawpui chhung branch an ni. Intihsiak hi August 18 zanah ṭanin, hemi zan hian branch 15 an zai ang. Inrinni (August 19) zanah branch 10, karleh Thawhlehni (August 22) zanah branch 15 leh Nilaini (August 23) zanah branch 10 an zai dawn. Intihsiak hi Central YMA Hall-ah neih niin, CYMA Youtube channel-ah pek chhuah ṭhin a ni ang..

August 25, Zirtawpni zanah Top 10-te intihsiakin, result puan a ni nghal dawn a ni. Final hi Vanapa Hall-ah neih a ni dawn a, local channel, LPS leh Zonet-te'n live-in an pechhuak ang.

CYMA hian kum 2019-ah lengkhawm zai intihsiak hi a lo buatsaih tawh a, hemi ṭum hian Republic Branch YMA chu pakhatna a ni.