Netflix-in subscriber mtd 238.39 a nei: A entu zingah Millenials an tam ber

18th August, 2023

Khawvela subscription based streaming service lian ber, Netflix chuan 2023 second quarter, June thla thleng khan khawvel pumah subscriber mtd 238.39 a nei a, nikum aia subscriber punna hi mtd 5.9 a tling.

Subscriber zinga 51% hi hmeichhia niin, mipa 49% an awm. Netflix entu zingah hian a tam ber chu 1981-1996 inkara piang, Millenials (33%) an ni. 1965-1980 inkara piang Generation X (26%) chuan a entu tam pahnihna niin, 1946-1964 Baby Boomers (22%) leh 1997-2012 inkara piang Generation Z (18%) ten an dawt.

Ram 190 chuangah Netflix hi pek chhuah a ni a; Russia, China, North Korea leh Crimea-ahte a awm ve lo thung.

Nikum khan Netflix hian original production 891 tichhuakin, USD tld 31.61 vel an lalut pha. Kumin kum chanve chhungin USD tld 16.349 a lalut tawh bawk.

Kum 1997, August 29-a din, Netflix hian kum 2007, January 15 aṭang khan streaming service hi a kalpui ṭan. Headquarters hi California, US-ah a awm a ni. A founder leh co-CEO hi Reed Hastings a ni a, chief content officer chu Ted Sarandos niin, Greg Peters chu CPO a ni. Thawktu mi 14,908 nei mekin, an zinga 49.6% chu hmeichhia an ni a, mipa 45% leh multiple gender identity 1.3% an awm.

Khawvel puma Netflix customer-te hian chawhrualin nitin darkar 3.2 ṭheuh video en ang an ni. Khawvel huapa video enna tana hun hman zinga 8% hi Netflix-a mi enna atan an hmang.

American mipui 47% chuan streaming service zingah Netflix hi an duh ber a ni. Kum 2020-a US-a orignal show tihchhuah lar zual zinga 80% chu Netflix hnuaia mi an ni.

Kum 2021, June thla khan Android leh iOS tana Netflix mobile app siam chu mi mtd 16 chuangin an download.

Kumin May thla khan ram 100 chuangah Neftlix hian password sharing a titawp a, a tihtawp hnu ni hnih chhungin subscriber hi nuai 1 vel a neih belh hman a ni.

Kumina Netflix paying customer zinga mtd 79.81-te hi Europe, Middle East leh Africa-a mite an ni a, USA leh Canada-ah member mtd 75.57 awmin, Latin America-ah mtd 42.47 leh Asia Pacific area-ah subscriber hi mtd 40.55 an awm.