Kum 65 chhungin Hot 100 No 1-ah hla 1,151 an lang

Billboard Hot 100 chart siam tirh aṭangin, kum 65 chhungin No 1-ah hla 1,151 an lang tawh.

Hot 100 chart hi kum 1958, August 4 aṭanga siam ṭan niin, chart siam a nih aṭang hian hla 30,000 chuang lang tawhin, chart-a hla lang zing aṭangin No 1 ni thei hi 3.8% an ni.

No 1 ni thei hla 10 chuang nei hi solo artist pariat leh group pahnih chauh an la awm. The Beatles chu No 1-ah hla 20 zet lanpuiin record siamtu an ni.

Hetih lai hian king of rock 'n' roll chu a lang ve lo. Hot 100-ah hian No 1 dinhmun hi vawi sarih chauh a hauh pha. Mahse a hla lar tak tak, “Don’t Be Cruel,” “Hound Dog” leh “Jailhouse Rock,” te hi Hot 100 chart siam hma lam an ni avangin a tawng sang zual zingah a tel ve ta lo a, mahse a hla dang “A Big Hunk O’ Love,” “Stuck on You,” “It’s Now or Never,” “Are You Lonesome Tonight,” “Surrender,” “Good Luck Charm” leh “Suspicious Minds.” te erawh chu No 1 a rawn nihpui hman.

Hot 100-a No 1 ngah ber chu The Beatles niin an hla 20 zet an lanpui. Mariah Carey chuan No 1 ni thei hla 19 a nei bawk a, Rihanna hla 14, Michael Jackson hla 13, Madonna hla 12, The Supremes hla 12, Drake hla 11, Whitney Houston hla 11, Janet Jackson hla 10 leh Stevie Wonder hla 10-te chu No 1-ah an lo lang tawh a ni.

Hetih lai hian No 1 hits club-a lang pha lo chiah chiah zingah Bee Gees, Elton John, Katy Perry, Paul McCartney, Taylor Swift leh Usher-te awmin, No 1-ah an hla pakua ṭheuh an lanpui tawh. Justic Bieber, Bruno Mars, George Michael leh The Rolling Stones-te chuan hla pariat ṭheuh an lanpui tawh bawk.