Facebook hmangtu zingah India mi tam ber

Khawvela social media platform lar ber, Fabebook data ranking thar ber tihchhuahah, July thla tawp thleng khan khawvel pumah Facebook hmangtu hi mi tld 3 dawn an tling tawh.

India chu Facebook hmangtu tamna ber ram niin, mi mtd 369.9 in an hmang a, hei hi a ram mipui awm zat aṭanga 22.1% a tling. India mi panga zela pakhatin Facebook hi an hmang a, a hmangtu zingah hian hmeichhia 23.7% an awm.

Facebook hmangtu tamna ber ram ni mah se, India-ah hian social network zingah Facebook hi hman nasat pathumna a ni pha chauh thung. Facebook aiin WhatsApp leh Instagram an hmang uar zawk a ni.

US chu Facebook hmangtu tamna ram pahnihna niin, mi mtd 186.4 in an hmang. Facebook hi US-a social network hman nasat ber a ni thung a, an ram mipui zinga 74.2% in an hmang a, a hmangtu hi hmeichhia 54.7% leh mipa 45.3%an ni thung.

Indonesia-ah mi mtd 135.1 leh Brazil-ah mi mtd 114.2-te'n Facebook an hmang a, Mexico ram chu top 5-ah lang bawkin, mi mtd 93.3-te'n an hmang.

Facebook hmangtu tamna ram 10 zingah hian Philippines (mtd 91.9), Vietnam (mtd 75.6) leh Bangladesh (mtd 54.2), Thailand (mtd 51.6) leh Egypt (mtd 47) an lang bawk a ni. Khawvel puma Facebook hmangtu tamna ram 10 zingah hian a zahve aia tam chu Asia ram an ni.