Manipur Zofate tan Rs. nuai 17 chuang hmu

Manipur Zofate puala Lelte Award Organising Committee huaihawta August 15 leh 16 zana concert neihna aṭang leh, Aizawl khaw chhung hmun hrang hranga bawm dawh aṭanga sum thawh tling khawm chu Rs. 17,61,908 zet a tling.

Vanapa Hall-a zan hnih awh concert buatsaih chhunga Gpay aṭanga sum hmuh hi Rs 8,70,443 a ni a, August 18-a Mt. Carmel School nena ṭangkawpa Aizawl hmun lun laia bawm an dawh aṭangin Rs 8,90,443 a tling bawk.

Manipur Zofate puala charity buatsaihtu, Lelte Award Organising Committee chairman C. Dinthanga chuan sum hlawm ṭhatna tura beisei, MINECO-ah charity khawn nan permit an hmuh loh avangin hun danga khawn leh tho an tum tih Vanglaini a hrilh. Aizawl khawpui hmun hrang hranga bawm dawha Mt. Carmel School naupangte, zirtirtute leh School Principal Lalnunkunga Sailo inpeknaah Organising Committee chuan lawmthu a sawi a, phal taka Gpay leh bawm dawh hmanga sum petute zawng zawng chungah lawmthu an sawi bawk a ni. Zai man awm loa tlawmngai taka pen chhuak, zaithiamte chungah Lelte Award Organising Committee chuan lawmthu an sawi bawk.

Ṭapuina sum an hmuhte hi a buatsaihtute hian Manipur Zofate mamawh zualna Eastern Zone Command, Western Zone Command leh Central Zone Command-ah te anmahni ngei kalin hlan an tum.