‘Friends From Mini Hotel’ Director tur Drew Pachuau

Mizote'n film industry-ah hma kan sawn zel a, kan thlen chin pawh a sang chho zel. California, US-a hmunpui nei, movie streaming app, Proreal chuan Mizo bakah, hmarchhak state danga lemchan thiam leh South Indian lemchan thiamte inlanna tur film, 'Friends From Mini Hotel' tih a siam dawn a, film director tur hi Drew Pachuau a ni.

'Friends From Mini Hotel'-a chang tur zingah hian Mizo lemchan thiam, Papuia Pachuau a tel a, ani bakah 'Mimi' film-a changtunu, Vanlallawmawmi (VLi) leh, 'Pa Hausa' film-a chang, Joe Pachuau pawh an tel.

Film shooting hi Shillong-ah neih ṭan a ni tawh a, Mizo lemchanthiamte pawh hian August 12 khan Shillong hi an pan tawh a ni. Hmarchhak state dang - Meghalaya, Arunachal Pradesh leh Nagaland aṭang pawhin lemchan thiamte an tel dawn a, South India aṭang pawhin Mizo film director kaihhruaina hnuaia chang tur an awm bawk a ni.

'Friends From Mini Hotel' scriptwriter hi In-House Production film hrang hrang ziaktu Samuel L. Pachuau a ni. Proreal in an produce dawn a, tlangzarh a nih hunah Proreal application-ah dah chhuah a ni ang.

A changtute hi hmun hrang hrang aṭanga kal khawm an nih ang avangin ṭawng pawh chi hrang hrang hman a ni dawn. English leh Hindi chu hmang tlanglawn ber niin, anmahni hnam ṭawng ṭheuh an hmang tel bawk a, English sub-title a awm dawn.

Director Drew Pachuau chuan, "English veka direct ngai pawh hi experience ṭha tak a ni hrim hrim tawh, hmasawnna kan chhar thar ṭheuhin ka ring," tiin hnam dangte nena an thawkho thei chu an hlawkpui thu a sawi.