Khiangte Construction Ṭhazual Gopsel : Arini ‘Isu ka hmangaih che’ a sang ber

Khiangte Construction Ṭhazual Gospel chart tharah R. Lalrinmawii (Arini) hla, 'Isu ka hmangaih che' chu rin lawk ang ngeiin pakhatnaah a rawn lang ta.

Praise on 2016-a pakhatna, tunlai hmeichhe gospel artist langsar ber pawl, Arini zaithiam zia inhrilh nawn a ngai lo, aw chak leh ropui tak a nei a, eng hla pawh sa se a sa nalh em em thei zel. Tun ṭum chart-a no. 1 a rawn nihpui, kawng engkima amah enkawltu Isua a hmangaih letna puanchhuahna leh chawimawina, 'Isu ka hmangaih che' tih hi June 4-a a tihchhuah a ni. He hla hi David Lalliansanga leh Lalhmachhuana Pachuau-te phuah a ni. A musician-te hi guitar- Ephraim, keyboard - Muanpuia, bass - Bruce Pachuau leh drums- Mikeji te an ni a, Zorinsanga Sailo-in a pui bawk. A music video hi Moonshine Studio kutchhuak a ni.

Mizo Idol lo ni tawh, Jerry Elaro pawhin 'I hnen ka lo pan e' tih chu hma rawn sawnpui zelin pahnihna dinhmun a rawn hauh thei ta. Chart hmasaa pangana aṭangin Tluangtluangi, 'I ropui zia' pawh pathumnaah a rawn invawrh chho bawk. Zorinsanga Sailo 'Min lo kai angem' leh Lalthansangi 'Zion Lal thu' te chu top 5-ah an lang bawk a ni.

Nancy Zothanmawii pawhin a hla pakhat chart-ah a la lanpui thei zel a, Seraphic Choir pawhin hma lam an pan zel e. Top 10 chart-ah hian Nghaktea Fanai, Rebecca Zorintluangin leh Christina Zorinpuii-te an rawn lang thar bawk.