Queen-in sawiselna a tam avangin 'Fat Bottomed Girls' paih

Queen-in Greatest Hits collection an tihchhuah turah an hla, 'Fat Bottomed Girls' chu a hla thu sawiselna a tam avangin an paih.

Kum 1978-a an guitarist Brian May-a phuah hi an studio album pasarihna, Jazz (1978)-ah khan an dah a, Queen original 1981 greatest hits album-ah khan 'Bohemian Rhapsody' leh 'We Will Rock You' te nen dah an ni bawk.

Mahse greatest hits collection an tihchhuah turah hian he hla hi telh a ni lo a, hei hian sawi zui pawh a hlawh hle. He hla hi tlangvalin hmeichhe thau a duhna thu a sawina a ni a, mi tam takin hetiang hla ṭha pangngai, hlimawm si hi tunlai society hian pawm thei lo a, sawisel a hlawh tlat chu hriatthiam a har an tih thu an sawi. Mihring pianphung eng pawh a mawi vek tih pawm tur ti-a kan inhrilh reng laiin, hmeichhe thau sawina a nih avanga sawisel leh tih bo duhna awm chu thil awm lo tak a ni, an ti.

Queen hian an great hits collection hi ṭhalaite'n an ngaihthlak thar leh theihna turin, audio platform thar Yoto-ah tihchhuah leh an tum a ni.