Parineeti leh Raghav-te inneih ni tur a chiang ta

Bollywood star, Parineeti Chopra leh politician Raghav Chadha-te chuan an inneih ni atan September 25 an ruat fel ta.

‘Ishaqzaade’ star Parineeti leh AAP leader Raghav-te hi May 14 khan Delhi-ah an lo inhual tawh a ni. An inkutsuih hun tur leh a hmun tur hi anmahni lam chuan official-in la puang lo mah se, media hrang hrangte'n an tarlang tawh a ni. September 25 hian Rajasthan-ah puitham takin inneih hi an buatsaih dawn a, an inneihna hmun atan pawh Udaipur-a five star hotel, Oberoi Udaivilas an thlang tawh niin an sawi.

Hetih lai hian Parineeti hi Akshay Kumar nena an chan dunna, 'The Great Indian Rescue' film changin a la buai ve mek bawk. He film-ah hiah Jaswant Singh Gill-a nupui, Nirdosh Gill lemah a chang a ni.