Box Office: Blue Beetle-in Barbie a nek chhuak ta

North America box office-a kar li chhung roreltu, 'Barbie' chu DC superhero pic, 'Blue Beetle' chuan a rawn nek chhuak ta.

Angel Manuel Soto direct pic hian tlangzarh karah US leh Canada-ah USD mtd 25.4 la lutin no. 1-ah a rawn lang a, mahse, a lak luh tura an beisei zat USD mtd 28 - 32 erawh a pha lo thung. DC Extended Universe (DCEU) title zinga opening week-a sum la lut tlem ber zingah a tel.

'Blue Beetle; hi DC comics charcater Jaime Reyes/Blue Beetle behchhana siam niin, DC Studios leh The Safran Company produce a ni a, DCEU film 14-na a ni. He film-ah hian Xolo Mariduena changin, DC-a Latino superhero hmasa ber a ni a, ani bakah Adriana Barraza, Damian Alcazar, Elpidia Carrillo, Bruna Marquezine, Raoul Max Trujillo, Susan Sarandon, leh George Lopez-te an chang bawk. Film entu zinga 39% pawh Latino an ni.

'Barbie' chu kar nganaah pawh no. 2 a la ni thei a, USD mtd 21.5 a lak luh belh leh. Record hrang hrang siamtu, Barbie hi a kar nga naah pawh entu tlakhniamnna hi 36.5% vel chauh a la ni a, khawvel pumah USD tld 1.28 a la lut tawh.

No. 3-ah theoreticial physicist J. Robert Oppenheimer-a biopic, 'Oppenheimer' pawh a la awm nghet zel a, USD mtd 10.6 a la lut leh a ni. 'Oppenheimer' hi no. 1-a lang pha si lo film zingah box-office lama che ṭha ber a ni thei a, global box office-ah USD mtd 700 a la lut tling tawh a ni.

"Teenage Mutant Ninja Turtles: Mutant Mayhem" chuan USD mtd 8.4 la lutin no. 4-ah a tla thla a, no. 5-ah USD mtd 8.3 la luttu, newcomer 'Strays' a rawn lang thung.