WhatsApp-ah HD photo thawn theih

Messaging app, WhatsApp chuan feature thar siam belh lehin, thlalak quality ṭha, high definition (HD) photo a thawn theih tawh.

WhatsApp hi messaging app zinga hman lar ber ni mah se thlalak inthawnin a resolution a tlak hniam nasat ṭhin avangin sawisel a tawk fo a, Meta chuan hei hi a rawn siam ṭha ta a ni. Meta CEO Mark Zuckerberg chuan feature thar tihchhuah a nih thu hi puangin, HD video thawn theihna tur pawh dah tel a ni thuai dawn tih a sawi.

HD photo hi Android, iOS leh web-ah thawn theih a ni tawh a, thalak lo dawngtu chuan HD a ni tih a lo hriat theihna tur small icon a awm bawk ang. HD feature thawn dawn chuan, thlalak thawn tur an select-in a chung lamah “HD quality” tih thlan tur a lo lang ang. Thlalak hi 3072 x 4080 resolution chin a thawn theih tawh dawn a, a hmaa WhatsApp-a thlalak inthawn kha 1536 x 2040 a ni thung.

HD thlalak thawn hi compress tho mah se, a hma angin a resolution hi a tla hniam tawh vak lo. Mahse HD quality thlan a nih loh chuan, 'Standard Quality' in thlalak hi a la inthawn tho a ni.