Ram pum huap lengkhawm zai intihsiak: Zaninah Top 10 Intihsiak leh Result puan

Central YMA leh PHE Department ṭangkawpin an buatsaih, ram pum huap lengkhawm zai intihsiakna neih mek chu zanin hian a hmawr bawk a ni dawn ta. A thiam zual branch thlan chhuah, Top 10-te chu intihsiak lehin, result puan nghal a ni ang.

Lengkhawm zai intihsiakna atan hian hla 10 thlan a ni a, hemi aṭang hian branch tin hian an duhzawng hla pathum thlangin, heng hla pathum aṭang hian hla chuam pakhat zel an nei.

Intihsiaknaah hian YMA branch 48 an inlan a, a tam zawk hi Aizawl khawpui chhung branch an ni. August 18 zan aṭang khan intihsiakna hi neih ṭan a ni a, Nilaini zan khan Top 10 hi puan a ni. Judge-te hi Lalromawia Saron Veng, B. Bawlkhuma Tlangnuam leh Vanlalsiama Saron Veng-te an ni.

Top 10 intihsiak neihna tura Vanapa Hall ruahman lawk chu remchan zawkna avangin Central YMA Hall, Tuikhuahtlang-ah neih a ni dawn a, zanin dar 7-ah ṭanin, result puan nghal a ni ang. Final hi local channel - LPS leh Zonet-te'n live-in an pe chhuak dawn a ni.

Lengkhawm zai intihsiaknaa pakhatna hian lawmman Rs 1,00,000 an dawng dawn a, pahnihnain Rs 70,000 leh pathumnain Rs 50,000 an dawng ang. Brnach tel zawng zawngte hnenah consoloation prize pek an ni dawn bawk.