Mizo film thar 'The Ghost Hunter' a en theih dawn ta

Tun hnaia Mizo film chhuak tharte kalphung ang lo deuh, horror-comedy ''Kaphranga Fatlum Awitea - THE GHOST HUNTER' chu zaninah mipuite en theih turin Lersia Play lamah chhawpchhuah a ni leh dawn ta.

'The Ghoster Hunter' hi tun hma deuha Lunglei lam chhuak film ṭha tak tak - Mission, House No. 109 leh Cabin film-te lo buaipuitu zinga mi, Johan Lalhmunmawia (JC Motion Pictures) siam a ni. Zanin dar 7 hian Saikuti Hall, Lunglei-ah release a ni dawn a, Lersia Play-ah zan dar 8:30-ah en theih turin chhawpchhuah a ni zui bawk ang.

He film-a hian Mizo film hriat hlawh tak, 'Ka U Liana' film-a changtunu Esther Hadasi Ralte, 'Where' film aṭanga hriat hlawh Elvis Ngurchungnunga bakah YouTube lama mi lawm hlawh tak Lalrozuala Chawngthu te chu a changtu langsar an ni. Anni bakah Zoram mipuite hmelhriat lar sa -Mastea, RSP leh K. Vanlalawmpuia (Zabilha) te pawh an inlan dawn bawk.

Thlahrang leh fiamthu inchawhpawlh karah hian Kohhran leh ram kalphung pawimawh tak tak tarlan tel a ni a, thla 10 zen zawn film siam nan hian hun an hmang. Lunglei leh a chhehvel hmun hrang hrangah an chang a ni.

Script writer hi Lalhlimpuia niin, David Zawma chu Assistant director a ni a, Mawitea Chhangte leh Johan Pautu-te chu director of photography an ni.

Lersia Play-ah zanin aṭangin a duh tan a en theih dawn a, a man hi Highest Quality - Rs. 354, High Quality - Rs. 295, Normal Quality - Rs. 236 leh Low Quality - Rs. 177-te a ni ang.