69th National Film Awards 2023 dawng turte puang

Indian cinema-a chawimawina ngaihhlut, 69th National Film Awards 2023 dawng turte chu Ningani tlai khan New Delhi-a National Media Centre-ah puan a ni.

National Film Awards hi Union Ministry of Information and Broadcasting hnuaiah, Directore of Film Festivals in a buatsaih ṭhin a ni. Kum 1954 khan 'State Awards' tih hminga siam ṭan a ni a, hetih lai hian regional language hrang hranga film ṭhate chauh award hi hlan an ni ṭhin. Kum 1967 aṭangin actor leh technician-te pek tel ṭan an ni. Best Actress Award dawng hmasa ber chu Nargis niin, 'Raat Aur Din' film aṭangin a dawng a, Best Actor Award dawng hmasa ber chu 'Antony Firingee and Chiryakhana' changtu, Uttam Kumar-a'n a dawng.

National Film Awards 2023-ah hian Best Actress Award dawng turin mi pahnih thlan an ni a, 'Gangubai Kathiawadia' changtu Alia Bhatt leh 'Mimi'-a changtu Kriti Sanon-te'n an dawng ang. Best Actor Award chu Allu Ajrun-a'n 'Pushpa' film aṭangin a dawng dawn bawk.

Best Feature Film Award dawng turin 'The Nambi Effect' thlan a ni a, 'The Kashmir Files' chuan Nargis Dutt Award for Best Film on National Integration a dawng dawn a ni.

National Film Awards 2023 dawng turte hi puan phawt niin, award sem hun tur erawh puan leh a la ni ang. Award dawng turte hi January 1, 202 leh December 31, 2021 inkara feature leh non-feature film, Central Board of Film Certification (CBFC)-in a certified aṭangin thlan chhuah an ni.

Award hi section pathum - Feature, Non-Feature leh Best Writing on Cinema-ah pek an ni ṭhin. Feature film-ah hian caterogy 31, non-feature film-ah category 24 leh best writing on cinema-ah caterogy pathum a awm.