Vanglaini Bihchianna - Entrepreneur Huang :LUSHAI ORGANICS

Damdawi (chemical) tel lo, organic thlai hrisel leh thianghlim siam chhuahna kawnga hma la tu, Lushai Organics chu Vanglaini chuan a bihchiang a -

Bul ṭan dan : Lushai Organics hi kum 2020-a din a ni a, a dintu hi H.Lalchhanhima niin tunah hian CEO a ni mek. Mizorama kuthnathawktute'n an thlai tharte awmze nei zawk leh man man zawka an hralh theihna tura ṭanpui hi an dinchhan bulpui ber a ni.

An thil tum : Kuthnathawktute thar chhuah sawngbawl (process) a, packaging leh labelling changkang zawka siam a, market mumal taka kalpui an tum. Damdawi (Chemical) hmanga thlai enkawl hi mihring tan hrisel lohna leh harsatna thlentu a nih avangin chemical tel lo, organic thlai hrisel leh thianghlim kan ei theih nan hma an la a, Organic campaign neiin, farmer-te training an pe ṭhin.

Lushai Organics hian an ei tur sawngbawlte hi Organic thei ang berin an kalpui a, packaging pawh an uluk hle. An product-te hi Food and Drugs Adminstration (FDA) Testing Laboratory-ah an test vek. Ram pawnah an thawn chhuah ṭhin avangin ram hrang hrangin an pawm, National Accreditation Board for Testing and Calibration Laboratories (NABL)-ah an test-tir ṭhin bawk.

Farmer Producer company eng emaw zatah Consultant ni mekin, Entrepreneurship Development Training Programme hrang hrangah training an pe bawk ṭhin.

Mizoramah season nei thlai chu a thar hun laiin a tam a, dah ṭawih leh paih pawh a tam, mahse, off season-ah hmuh tur a awm leh tawh ṭhin lo. Hei vang hian mumal taka process tumin hma an la chho mek a ni.

Thawktu : Tunah hian mi 5/6 vel an thawk mek. Reiekah Processing Unit an din a, Mission Organic Mizoram (MOM) nen thawkhoin Organic lamah hma an la a, Horticulture Department nen pawh hma an la mek bawk.

Thil siam chhuah : 

Lushai Organics hian product chi hrang hrang an nei a, chungte chu : 1) Organic Turmeric Powder 2) Curcumazo(Turmeric Food Supplement) 3) Blue Tea 4) Turmeric Facepack 5) Turmeric Soap 6) Thingpui Sen(tea bag) 7) Sunhlu Candy 8) Turmeric Oil serum 9) Diabetic Care(Food Supplement) 10) Cinnamon Tea.

Skin Care product, Mizo vun mil leh effective tak an siam bawk a, chungte chu: 1) Lip Balm 2) Lip Gloss 3) Pet Soap (Anti-bacterial, Anti-tick) 4) Pet Oil (Anti-septic) 5) Facepack 6) Serum (Turmeric Oil, Argan Oil, Vit E).

Food Supplement leh Blue Tea : An product zingah Food Supplement leh Blue Tea-te hian ngaihven an hlawh zual. Food and Drugs Administration(FDA) aṭanga Food, Health & Nutraceutical Manufacturing License nei thlapa siam an nih avangin a himin a hrisel hle.

1) Curcumazo : He Food Supplement hi Aieng leh Black Pepper aṭanga siam a ni. Laboratory aṭanga Aieng ṭhatna lak chhuah “Curcumin extract 95%” telh a ni bawk. Pumpui ulcer, inthiar ṭha thei lo, Allergy nei, taksa vung, Cholesterol level sang, chaw pai ṭawih harsat, BP sang leh zunthlum, Alzheimer, ruh leh tha na nei tan damdawi ṭha tak a ni a, vun a tiengin a ti ngo bawk. Anti-oxidant ṭha tak niin, immune system a boost thei bawk.

2) Diabetic-Care : Zunthlum leh a kaihhnawih natna nei tana siam a ni. Bitter Gourd (Changkha), Jamun, Curcumin leh Gooseberry (Sunhlu) aṭanga siam niin thisen a tifai a, sugar level sang lutuk tur a tihniam thei. BP sang a tihniam thei a, Insulin insiam tur a ṭanpui a, Thin leh pancreas hnathawh a tichak a, digestive system a tichak a, anti-oxidant ṭha tak a ni.

3) Blue Tea : Hei hi Thingpui anga hman chi, Butterfly Blue Pea aṭanga siam a ni. Flavanoids, Polyphenols leh Pro-anthrocyanins a tam a, thau chhia a paih a, thluak hnathawh a tihchak avangin Anxiety leh Stress nei tan a ṭha. Vun a siam ṭha a, vun chuar tur a veng thei a, anti-oxidant tha tak a ni bawk.

Zawrh chhuah lam :

Aizawl khawpui chhung dawr leh Mart hrang hrangah an zuar chhuak. District hrang hranga zuar turin hma an la mek a, zuar chhawng duh tan biak pawh theih reng an ni. Pawl leh mimal ṭhahnem takin an zuar mek bawk. An product a changkang a, packaging a mawiin mi a hip a, tourist leh khual ṭha lo zin ṭhinte present atan pawh zahpuiawm lo tak an ni. Sorkar pawhin Mizo thil siam ngei hi kuthnathawktute promote nan hmang ṭhin se a duhawm hle.

Reiekah Processing Unit neiin Chanmari, Aizawlah stock point an nei bawk.

Hmachhawp : Product an neihte changtlung zawk leh quality zawka siam chhoh an tum. Raw material an hmuhna, farmer-te'n thlai hrisel leh thianghlim tam zawk an thar chhuah theih nan Society din a, hma lak an tum bawk

Entrepreneurship chungchang : Lushai Organics CEO H. Lalchhanhima chuan, Mizo ṭhalaite tan entrepreneurship lama kal hi eizawnna ṭha tak a ni zel dawn a ni tiin, "Innghahna tlak, tu leh fate thlenga rochun theih eizawnna hi a hlu a, ṭhalaite'n kan ngaihven deuh deuh a ṭul hle," a ti. Food Processing lamah Mizo ṭhalai tan hma lakna tur a la tam hle tih Vanglaini a hrilh. "Kan ram thar chhuah ngei process a, value addition lo siam a, packaging mumal taka kan lo siam hian kuthnathawktute eizawnna kan siamsak bakah kan ram tan hmasawnna rahbi kan siam chho zel a ni tih hriain, Mizo ṭhalaite hian Entrepreneurship lamah hma kan lak chhoh a ṭul hle a ni," a ti.

Contact theihna: Mobile: 9612558102; Instagram: lushai_oranics