Voice of Salvationist 2023: Tlangnuam nula Vanlalruati a thiam ber

Territorial Salvation Army Youth Council (TSAYC) buatsaih India Eastern Territory huam chhunga SAY member te zaia intihsiakna, Voice of Salvationist chu kar liam ta Zirtawpni zan khan zawh fel a ni ta a, Tlangnuam Corps nula Vanlalruati chu pakhatna a ni. Pahnihna chu PC Lalrinliani, Chanmari West Corps a ni a, Angela Zonunmawii, Lily Veng Corps chu pathumna a ni.

Dawrpui Multipurpose Centre-ah intihsiak kharna leh result puanna hun hi hman a ni a, mi tam takin a hmunah an chhim. Hemi zan hian Top 5 - Angela Zonunmawii, Dennis Lalbiakkaia, Liansangpuii, PC Lalrinliani leh Vanlalruati te chu hla pakhat ṭheuh hmangin a intihsiak leh a, hemi hnu hian result puan zui a ni.

Voice of Salvationist 2023-a pakhatna Vanlalruati hian lawmman pawisa fai Rs. 50,000 bakah, thilpek ṭhahnem tak a dawng. Pahnihna PC Lalrinliani hian Rs. 30,000 leh thilpek a dawng a, pathumna Angela Zonunmawii hnenah Rs. 20,000 hlan a ni bawk.