Milan-ah Mizo designer Escape Engmawia

Fashion capital, Milan khawpuia fashion show neih turah Mizo designer lar, Escape Engmawia kutchhuakte pholan a ni dawn.

Consulate General of India Milan, Italy leh NEIFT Guwahati buatsaihin, September 9 hian Milan khawpuiah North East Festival neih a ni dawn a, festival-a fashion show neih tura designer thlan chhuah zingah, Mizoram aṭangin Escape Engmawia hi thlan a ni.

North East India Festival hi Italy leh India ten inlaichinna ṭha siamna tura an buatsaih ṭhin a ni a, kumin hi a vawi 17-na tur a ni. Kumin festival hi Villa, Necchi Campiglio, Milan-ah neih a ni ang.

Show neih turah hian India ṭangin model pahnih kal tura tih an ni bawk a, Femina Miss Assam 2018 Sunaina leh Mizo model zinga ṭha ber pawl, Kimkimi Ralte thlan an ni. Mahse Kimkimi hi visa a fel theih loh avangin a kal thei dawn ta lo.

Escape Engmawia hian September 4-ah Milan a pan dawn a, show neih tura a collection pho chhuah tur hi a Zo thei anga tih a tum tih a sawi. "Khu lam chu fashion hmunpui a ni a, keini aia engkim nei ṭha an ni. Kan danglamna tur chu an neih ve loh kan hnam puan, kutzeh mawi tak tak taka siam zu show ka duh. Mahse hun a tepter tawh lutuk a, duh angin ka inbuatsaih thei lo a ni," tiin Vanglaini a hrilh.