Khiangte Construction Ṭhazual Lengzem: Pakhatna chu David Darlong

Khiangte Construction Ṭhazual Lengzem chart tharah, Mizo Idol 2022-a pathumna, David Darlong chuan ama hla phuah ngei, 'Min tiam rawh' tih hmangin pakhatna dinhmun a rawn luah.

David Darlong hi Mizo Idol 2022 intihsiak laia ṭan hlawh tak niin, sawi nawn ngai loin a zaithiam zia kan hre chiang vek awm e. A hla, 'Min tiam rawh' tih hi July 4 khan a tichhuak a, music leh recording hi Tluanga Hnamte, Westend Studio kutchhuak a ni a, video hi Anthony Woww siamsak a ni. David hian a hla dang, 'Lo kir hram rawh; tih chu Top 5-ah a lanpui thei bawk a ni.

Mizo hmeichhe top artist zinga mi, a zaithiam mai bakah stage-a a che vel hmuhnawm thei tak mai, Zaii Hauchhum pawhin 'Kar hla ṭhin mah se' tih chu pahnihnaah a rawn chhohpui a, pakhatna ni thei turin a dinhmun a siam ṭha zel. Artist hrang hrangte'n an sak, 'Zo Fate Lal Ram' tih pawh pathumnaah a rawn kai sang bawk a, Angela Malsawmpari 'Lo Kir hram rawh' pawhin hma a rawn sawn zel e.

Marina Vanhriatpuii Varte leh Saka te chu chart-ah an la cham chhunzawm zel bawk a, anni bakah Top 10-ah hian mi thar pathum - Siampuii Ralte, Eddie Pachuau leh Manuna te an rawn lang bawk.