Spice Girls-in movie thar siam tum

Kum 1990 chhoa English girl group lar zet mai, Spice Girls chuan an hla hit behchhanin movie thar siam an tum.

Spice Girls member - Gerri Halliwell, Melanie Brown, Emma Bunton, Melanie C leh Victoria Beckham-te hian an lar vanglai, 1997 khan an khawsak dan tarlanna, Spice World an siam tawh a, box office lamah a che ṭha hle.

Movie thar siam an tum hi 'Spice World' nena kalphung hrang hlak a ni dawn thung a, an hla hit hrang hrangte behchhanin an siam dawn a ni. Member-te pawh hi an phur tlang tawh le.

'Wannabe' hitmaker-te hian kum 2012 khan an hlate hi stage musical-ah siamin, Viva Forever tih hmingin an lo tichhuak tawh bawk. Mahse beisei anga a hit loh avangin thla ruk hnuah show hi an titawp leh nghal a ni.