Box Office : No. 1-ah 'Gran Turismo' a lang thei hram

North America box office-ah film thar, 'Gran Turismo' chuan tlangzarh karah USD mtd 17.3 la lutin no. 1 a rawn ni thei hram.

Video game series behchhana siam, 'Gran Turismo' hian kumin chhunga film chhuak tawha sum la lut tam ber ni mek, a kar ruknaa USD mtd 17.1 laluttu 'Barbie' a rawn khum thei hram a ni. 'Barbie' hian khawvel pumah USD tld 1.34 a la lut tawh.

Neill Blomkamp-a direct, Archie Madekwe, Orlando Bloom leh David Harbour channa, 'Gran Turismo' hi August 11-a tlangzarh tura ruahman a ni a, mahse, actor-te nawrh huaihawt avangin tlangzarh hun hi sawn hlain, August 25 khan an tichhuak ta chauh a ni. PlayStation video game ngaina tak, Jann Mardenboroug-a'n professional race car driver nih tuma a beih chhoh dan chanchin hi true-story movie a ni a, critics lam aṭangin review pawh a hmu ṭha a, CinemaScore chuan 'A' grade a pe. Khawvel pumah USD mtd 53.8 a la lut tawh a ni.

Kar hmasa lama no. 1 hauhtu, 'Blue Beetle' chu a kar hnihnaah no. 3-ah a tla thla nghal a, USD mtd 12.8 a la lut. 'Oppenheimer' pawhin USD mtd 9 la lutin no. 4-ah a tla thla bawk. Oppenheimer hi Christopher Nolan film siam tawh zinga domestic box office-a sum la lut tam pathumna a ni pha tawh. USD mtd 6.1 la luttu 'Teenage Mutant Ninja Turtles: Mutant Mayhem" chuan Top 5 a rawn khar.

North America Box Office top 10-ah hian Liam Neeson channa, action pic 'Retribution' bakah Dennis Quaid channa, sports drama 'The Hill' te pawh an rawn lang a, anni bakah Meg 2, The Hill leh Haunted Mansion-te an lang bawk a ni.