Billboard Hot 100 : A chung berah ‘Richmond’ awm chhunzawm

Billboard Hot 100 song chart-ah country singer-songwriter Oliver Anthony-a viral hit, 'Rich Men North of Richmond' chu kar hnih chhung no 1-ah a awm ta.

August 11-a tihchhuah, 'Rich Men North of Richmond' hian a kar hnihnaah stream maktaduai 22.9 neiin, download 117,000 a la nei bawk. Digital Song Sale-ah kar hnih no. 1 ni tawh bawkin, Streaming Songs-ah no. 4 aṭangin no. 1-ah a chho bawk. He hla hi US President thlanna neih tura campaign-naah left leh right party-te pawhin inbeihna atan an hmang zui a, August 23-a Republican presidential debate neihah pawh an play a ni. Mahse Oliver Anthony chuan hei hi a duh loh thu sawiin, politics lam a ngaihven lo a, liberal leh conservative-te kal danah duh lohna lai a nei ve ve tih a sawi.

Antony hi chart history lama hnuhma la nei miah loh zingah Hot 100-a debut no. 1 nei thei hmasa ber a ni. 'Rich Men North of Richmond' hi hla thupuia US khawpui hming hman zingah, kum 1985 hnu lama Hot 100-a no. 1 ni thei pariatna a ni bawk.

No. 2-ah Luke Combs-a'n Tracy Chapman' Fast Car' a cover chu a kar sarihna atan a awm chhunzawm leh a, Morgan Wallen 'Last Night' chu no. 3-ah a awm bawk. He hla hi kar 16 chhung No 1 ni thei a ni. Hot 100-a no. 1-3 te hi country hits vek an ni. Taylor Swift 'Cruel Summer' no. 4 a tla thla a, Doja Cat 'Paint the Town Red' chu no. 15 aṭangin no. 5-ah a rawn chho thung.

Top 10-ah Rema & Selena Gomez, Gunna leh Olivia Rodrigo-te hla bakah, Barbie move soundtrack pahnih, 'Barbie World' leh 'Dance the Night' te an la lang bawk.