80th Venice Film Festival ṭan

Venice International Film Festival vawi 80-na chu Nilaini aṭang khan neih ṭan a ni. Venice Film Festival hi khawvela film festival zinga upa ber niin, international film festival 'Big Five' zingah a tel bawk.

Festival hi Italy-a Venetian Lagoon-a thliarkar, Venice Lido-ah neih a ni a, September 9 thleng a awh ang.

Ni 10 awh festival neih chhung hian film eng emaw zat premier ṭhin a ni a, director leh star lian takte an film promote turin an inlan nasa ṭhin. Kuminah erawh Hollywood actor-te nawrh huaihawt avangin big star tam zawk chu an inlan thei dawn lo a ni. He festival hi award season bul ṭanna anga ngaih a ni a, Oscar award thlenga nghawng a neih avangin ngaihven a hlawh ṭhin hle. Osward Awards-a best director lo dawng tawh 11 zinga pariatte film chu Venice festival-a premier an ni.

August 30 zanah Italian World War Two film "Comandante" hmangin Festival hi hawn a ni a, September 9-ah Spanish-language Netflix drama "Society of the Snow" in khar a ni ang.

Italian director Liliana Cavani leh Hong Kong actor Tony Leung Chiu-wai te chu Golden Lion for Lifetime Achievement hlan an ni dawn.

Kumin festival-ah hian main international competition atan film 23 thlan niin, heng zingah hian opening film 'Commandante' (Italy), 'The Killer' (US), 'The Promeised Land' (Denmark,Germany, Sweden), 'Maestro' (US) , 'Ferrari' (US) , 'Evil Does Not Exist' (Japan), 'Priscilla' (US) te pawh an tel. Main competition-a jury president hi American filmmaker Damien Chazelle a ni.

Competition-a tel lo, film screen tur hian fiction film 13 leh non fiction 6, series pahnih leh short film pakhat thlan an ni. Special Screening nei turin 'The Lion's Share: A History of the Mostra' chu thlan a ni bawk.