The Games Awards 2023 sem hun tur puang

Khawvel ram hrang hranga video games fan-te nghahhlelh tak, The Games Awards 2023 chu December 7-ah sem a ni dawn.

The Games Awards hi kum 2014 aṭang khan sem ṭan a ni a, video games fan-te ngaihhlut a hlawh hle. Kumin hi award an sem vawi 10-na tur niin, December 7 hian Los Angeles-a Peacock Theater-ah sem a ni ang. Kum danga an lo tih tawh angin, he event hi platform hrang hrang - Twitch, YouTube, Facebook, TitTok Live, Steam leh X-ahte live stream a ni ang.

Nikuma Award semah khan platform hrang hranga an live thlirtu kha mi maktaduai 103 an tling. Category thar, Best Adapation telh a ni a, 'The Last of Us' star Pedro Pascal leh Bella Ramsey-te chu award semtu zingah an tel a ni. 2022-ah hian Sony Santa Monica 'God of War Ragnarok' chuan award a dawng hnem ber a, Game of the Year Award chu FromSoftware ' Elden Ring' in a dawng.

Kumina award semnaah hian big star inlan an awm dawn leh dawn loh organiser lam chuan an la sawi lang lo a, mahse, The Game Awards Orchestra leh artist dang aṭangin musical performance erawh a awm dawn tih an sawi tawh thung.

The Games Awards hi gaming industry tana event pawimawh leh hlu tak a ni a, chawimawina hrang hrang sem chhuah a nih bakah, games developer leh publisher-te'n an project thar an pholanna hun leh, games an siam chhuah tawh update a nih dante an puanzarna hun a ni nghal bawk.