ṬHAZUAL FAKNA No. 1-ah Pensy 'Ka tan Krawsah ngei chuan'

Ṭhazual chart-a mikhual lo tak leh Zoram rimawi khawvela hriat hlawh tak Pensy B Lalthangliani hla 'Ka tan Krawsah ngei chuan' chu Ṭhazual Fakna chart-ah pakhatna a ni a, Seraphic Choir 'Hnehna Lallukhum' chu pahnihna niin Bethsy Lalrinsangi 'Isua nen chuan' chu pathumna a ni bawk.

May thlaa a tihchhuah kha a ni a, August a nih meuh chuan Ṭhazual Fakna Chart-ah No.1 a ni der tawh. Pensy hi Mizo gospel singer zingah chuan Zoram mipuite'n an duh ber pawl a ni reng a, a hla tihchhuah ho reng reng hian ngaihthlak a hlawh ṭhin hle.

'Ka tan Krawsah ngei chuan' hi  Zohmaa Jahau phuah a ni a, Blue wave Records-ah recording hi tiin Peter Video Production kut chhuak music video hmuhnawm tak nen, Pensy a lo zaithiam bawk nen, chart-a No.1 a ni pawh hi a mak lo hle.

'Ka tan Krawsah ngei chuan' hi misual leh phatsantu, thlamuanna zawng si nun Pathianin Kraws hmanga kawng min kawhhmuh zia tarlanna hla ṭha tak a ni a, ngaihthlak a manhla bawk a, chart-ah pawh ro a rawn rel hma hle a ni.

Chart hmasaa palina Seraphic Choir 'Hnehna Lallukhum' chu pahnihnaah a rawn invawrh a, anni hi pakhatna ni thei tur pawhin an dinhmun a ṭha sawt hle a, chart leha an dinhmun tur hriat a chakawm tawh hle.

Hetihlai hian chart hmasaa pathumna Bethsy Lalrinsangi 'Isua nen chuan' bawk pathumna a ni leh a, ani hi a hmun ngaiah a la awm chhunzawm a, Bethsy hian 'Isua nen chuan' hi a zawnin Ṭhazual chart-ah hian No.1 ṭum hnih ngawt a nihpui theih kha a ni a, Top 3-ah hian a tang rei tawh hle a ni.

Chart hmasaa pakhatna Hmingtea Chhangte 'Hun duhawm' chu palinaah a awm ve ta thung a, Lalbiaktluanga (Btea) chuan a hla thar 'Fak tlak I ni' hmangin Top 5 a rawn khar ve thung a ni. Chart Top 10-ah hian gospel singer langsar tak tak an awm nual a, Ṭhazual Fakna chart hi a ngaihnawm chho zel dawn niin a lang.

1    Pensy     - Ka tan Krawsah ngei chuan

2    Seraphic Choir     - Hnehna Lallukhum

3    Bethsy Lalrinsangi     - Isua nen chuan

4    Hmingtea Chhangte     - Hun duhawm

5    Lalbiaktluanga (Btea)     - Fak tlak I ni

6    Maruati & Rla     - A hnai reng Isua

7    Dr. Zova     - Ka puang zel dawn

8    Sanga Renthlei     - Lal Isua duhawm ber

9    Mapuii     - Zirtirtu ṭha

10    One In Christ     - Hriselna