Darbu Music App : August-a ngaihthlak nasat ber Aengi & Rosalyn; Hralh chhuah tam ber The Leprosy Mission Choir music track

Darbu Music App chuan August thla chhunga hla hralh ṭha Top 5 leh leh play nasat Top 5 an tichhuak leh ta.

August thla chhunga Darbu App chhunga hla play nasat ber chu Mizo ṭhiangzai (duo) thiam leh lar ber pawl, Aengi & Rosalyn-te hla 'Rinawm min tiam kha' tih a ni a, ngaihthlak an hlawh bakah a hralh chhuah tam lamah pawh Top 5-ah an lang pha bawk. He hla hi July thla pawh khan Darbu-a hla ngaihthlak nasat ber a lo ni tawh bawk a ni.

August thlaa hla ngaihthlak nasat zingah hian US lam artist, Yellow Muzik hla pathum an la lang a, Top 5 hi Evenflow hla thar,' A.n.A' chuan a rawn khar.

Darbu-ah hian hla release hian hun lai a nei ve deuh a, hla thar tam viau thla a awm laiin, hla thar neih mumal loh thlate pawh a awm ve ṭhin. August thla pawh hian hla lei theih tura tihchhuahna, Darbu Exclusive-ah hla thar release lian tham sawi tur a awm lo.

He tih lai hian The Leprosy Mission Choir-in an hlate zaipawl leh midangte'n an lo sak a, an lo hman ve theih nana music track an zawrh chhuah chuan hlut a la hlawh zel a, August thlaa hralh chhuah tam ber a ni. Soundtrack siam turin studio pan a, hun leh sum tam tak sen ngai lo turin, Darbu kaltlang hian soundtrack awlsam takin a lei theih a, Mizo Female group chuai thei lo Vohbik pawhin an hla soundtrack-te lei theihin an chhawp chhuak tawh bawk.

August thlaa Darbu aṭanga hla hralh chhuah tam zual panga zingah hian Joseph Zaihmingthanga, Kimkima, Aengi & Rosalyn leh Zoramchhani te hla an lang bawk a ni.

K.Hminga album thar a hnai

Mizo artist-te pawhin Darbu App an hmang ṭangkai chho zel. Mizo mipa lengzem artist ṭha ber pawl, K.Hminga pawhin Darbu kaltlangin hla thar ṭhiau 10 awmna, full album tihchhuah thuai a tum.

K. Hminga hian a album thar tura a hla tam ber hi studio lamah recording pawh a peihfel thawkhat tawh nia hriat a ni. Kan top artist-te zingah album puitling tichhuak an awm khat ta hle a, hetiang karah ṭangthar zinga zaithiam bakah music composer ṭha ber zinga mi, K.Hminga album lo chhuak tur hian nghakhleltu a ngah hle.