WWE wrestler ṭhin James 'Kamala' Harris a thi

WWE wrestler hlui James Harris, ring chhunga Kalama tia hriat lar chu Pathianni khan kum 70 mi niin a thi.

Kamala hian August 5 khan Covid-19 a kai tih hmuh chhuah a ni a, damdawi-in lam panpui a ni, August 9 khan cardiac arrest a neih hnuah a thi a, cardiac arrest a neih thu hi a thih thu tarlanna ṭhenkhatah tarlan ni mah se WWE Website chuan a thih chhan tak erawh a tarlang tel lo. A thih thu hi nimin khan WWE Website chuan an rawn tichiang a, Wrestling tuipuitute chuan an ui hle.

'Kamala' emaw 'The Ugandan Giant' tia hriat lar James Harris hian kum 1984 khan WWF luhchilhin a hming a rawn chher ṭan a, kum 20 chuang lai wrestling khawvelah hian a hun hmangin wrestling superstar Hulk Hogan, The Undertaker leh Andre the Giant-te nen pawh an inbei tawh ṭhin a ni.

Wrestling-a telnaah hian African hmaikawr a vuah ṭhin a, warpaint leh loincloth hmangtein a inthuam ṭhin bawk. Ring chhungah chuan ke lawngin a che mai ṭhin a, a ṭawng mang ngai lo bawk.

Kum 2006 thleng khan Mid-South, World Class Championship Wrestling, WCW leh WWE-ahte a inlan ṭhin a ni.

Kamala hi May 28, 1950 khan Senatobia, Mississippi-ah a piang a, Ft 6 leh inches 7 laia sang niin kg 172 laia rit a ni. WWF-a a inlan hma hian Wrestling-ah hian a tel tawh ṭhin tho a, kum 1978 vel aṭang khan Wrestling-ah hian bul a ṭan a, kum 2010 khan Wrestling a chawlhsan fel chauh thung.

Kum 1974 aṭanga 2005 thleng khan Sheila Stover nen an innei a, an inṭhen hnuah hian Melissa Guzman nen an innei leh a ni. Wrestling piah lamah hian rimawi lamah a tui bawk a, hla 100 vel phuah hmanin heng a hla phuahte hi amah ngeiin a sa ṭhin bawk. Album-te pawh a tlangzarh hial a ni. Kum 2015 khan a autobiography pawh a tlangzarh nghe nghe.

Kum 1992 aṭang khan thisen sang leh diabetes a nei tih hriat a ni a, he a natna vang hian kum 2011 khan a ke veilam chu tan a ngai hial a, Wrestling a chawlhsan chhan pawh hi heng a harsatna tawh vel vang hi a ni a,  dialysis treatment a lak duh loh bawk si avangin loh theih lohin Wrestling a chawlhsan a ngai a ni. Kum 2012 khan a ke dinglam an tan sak leh bawk a, bawrhsawmnain a bawm zui a ni ber.

Kum 2017-ah khan a lung leh a chuap vela tui tling vangin emergency-a zai a lo tawk tawh bawk. Heng vel avang hian enkawl chhunzawm reng a ni a, Covid-19 pawh hi kar tina a tlawh ṭhin dialysis centre aṭanga kai a nih an ring.