SAG-AFTRA-in video games company lakah nawrh huaihawt tum

TV leh film company-te laka nawrh huaihawt mek, Screen Actors Guild and American Federation of Television and Radio Artists (SAG-AFTRA) chuan video games company liante lakah nawrh huaihawt leh an tum a, national board chuan member-te ngaihdan a la mek.

SAG-AFTRA hian hlawh tihpun leh artificial intelligence (AI) chungchanga an thil phutah video games company-te nena an inbiaknaah inremna an siam thei lo a, hei vang hian an thil phut nawrna atan hian nawrh huaihawt leh an tum nia sawi a ni.

July 13 aṭang khan actor-te hian TV leh film company-te lakah nawrh hi an huaihawt a, tun thlengin inremna an la siam thei lo. Nawrh an huaihawt avang hian Hollywood film siam lai tam tak a bahlah phah hlawm a ni.

Union hian video game maker-te nen hian contract hran an siam a, an contract neih mek hi November 7 hian a zo dawn a, mahse, thil sawiho a nih theih nan kum khat an pawhsei a ni. Contract thar siam dan tur chungchanga an thil phutte ngaihtuahin, September 26 hian inbiakna an nei leh ang.

SAG-AFTRA hian thil man to zel avangin video game performer-te hlawh hi 11%-a tihsan bakah, an contract kum hnihna leh kum thumnaah 4%-a tihsan belh leh an phut a ni. He an thil phut hi nawrh an huaihawt mekna, Alliance of Motion Picture and Television Producers laka (AMPTP) laka an phut ang bawk kha a ni. Inbiakna an neihpui mek, video games company zingah hian Activision, Epic Games leh WB Games pawh an tel.