Khiangte Construction Ṭhazual GOSPEL: ṬHAZUAL GOSPEL Top 10

Khiangte Construction Ṭhazual Gospel chart-ah a zaithiam zia sawi nawn ngai lo, Mizo Idol pawh lo ni tawh, Jerry Elaro chuan chart chung ber a rawn luah ta.

Pakhatna dinhmun a hauhpuina, 'I hnen ka lo pan e' tih hla hi Jerry hian July 1 khan a tichhuak a, he hla hi Isaac Hnamte phuah a ni. HC Recording-ah record-in, music arrangement hi Rina Rethlei kuthnu a ni a, keyboard hi Rinsangzuala chuan tumsakin, a zainaah hian Duati Kingbawl chuan a pui bawk. A music video hi Moonshine Studio kutchhuak a ni.

Pathianin a mite a venna leh enkawlna, A ta a nihzia a lantir ṭhinna leh, Pathianah chauh thlamuanna a awm thu puanchhuahna hla ropui tak hi a mawiin a satuin a thiam bawk a, en leh ngaihthlak a manhla hle.

Tluangtluangi 'I ropui zia' tih pawh hma rawn sawn zelin chart tharah hian pahnihnaah a rawn lang. Pathumnaah Zorinsanga Sailo, 'Min lo kai angem' rawn chho bawkin, Lalthansangi 'Zion Lal thu' leh Nancy Zothanmawii' Thlarau thianghlim min chenchilhtu' tihte chu Top 5-ah an lang.

Top 10 chart-ah Seraphic Choir, Nghaktea Fanai leh Rebecca Zorintluangi-te an la lang chhunzawm zel a, anni bakah mi thar pahnih, Dr Zoa leh Marshall Fka ft. Moria run te an rawn ve bawk.