‘Eras Tour’ movie-in 'Spider-Man' record a khum

Taylor Swift 'Eras Tour'concert film chu US theatre-ah tihchhuah a ni dawn a, tihchhuah hma aṭangin pre-sale tam lamah record a siam nghal.

AMC Theatres-in a tarlan danin, "Taylor Swift: The Eras Tour" hian pre-sale tam record siamtu, kum 2021-a nikhat chhunga ticket USD mtd 16.9 man hralhtu, Marvel superhero pic, 'Spider-Man : No Way Home' chu rawn khumin, ticket hralh chhuah aṭanga darkar thum chhungin USD mtd 26 man hralh nghal a ni tih a sawi. "The Eras Tour" hian kumin chhunga nikhatnaa ticket sale tam ber record a siam bawk.

AMC hi khawvela theatre chain lian ber leh, film official distributor a ni. "Eras Tour" movie hi an elpui, Regal leh Cinemark bakah independent location-ahte chhuah tel a ni dawn bawk a ni. Theatre chain pathum aṭanga ticket pre-sale aṭang hian USD mtd 30 vel an hmuh theih an beisei.

Pop superstar hian a record-breaking stadium tour film tihchhuah a tum thu hi August 31 khan Instragam-ah puangin, October 13-ah North America theatre hrang hrangah tihchhuah a ni dawn tih a sawi. A thawm a lian bawk a, October 13-a tlangzarh tura lo ruahman tawh, supenatural horror film, 'The Exorcist : Believer' chu Eras Tour film nena tlangzarh rual hi duh loin, Universal leh Bloomhouse chuan an film tihchhuah hun tur hi October 6-ah an sawn hma phah hial a ni.