Box Office: No. 1-ah beisei aia che ṭha 'The Equalizer 3'

North American box office-ah Denzel Washington channa, 'The Equalizer 3' chu an beisei phak baka rawn che ṭhain, tlangzarh karah no. 1-ah a rawn lang.

Antoine Fuqua-a film, vigilante action film hi tlangzarh karah USD mtd 28-30 la lut tura beisei a nih laiin, he threequel hian an beisei zat hi khumin USD mtd 34.5 a la lut thei a ni. Critics lam aṭang pawhin review a hmu ṭha hle a, Rotten Tomatoes-ah approval rating 94% neiin, CinemaScore-ah audience-te'n A an pe bawk a ni.

'The Equalizer 3' hi US Labour Day weekend-a film tihchhuah tawh zingah sum la lut tam ber dawttu niin, kum 2021-a USD mtd 75 la lut thei, Marvel hit 'Shang-Chi and the Legend of the Ten Rings' chauh a pha lo a ni. He film hi Denzel Washington film series-a a ṭha ber nia sawi a ni bawk.

July thlaa tihchhuah tawh, 'Barbie' chu sum la lut hnem pahnihna a la ni pha a, USD mtd 10.6 a lal lut belh leh. 'Blue Beetle' chuan a kar thumnaah no.-3 ah awm chhunzawm lehin, USD mtd 7.3 a la lut. Kar hmasaa no. 1 rawn hauhtu, 'Gran Turismo' chuan US mtd 6.6 la lutin, tlangzarh a nih aṭanga a kar hnihnaah no. 4-ah a tla thla nghal. Christopher Nolan "Oppenheimer" pawh tlangzarh a nih aṭang a kar sarihnaah no. 5-ah a la tang a, kumina film chhuak tawh zinga sum la lut tam pathumna a ni pha tawh a ni.