Music Walk of Fame-ah UB40

Reggae band UB40 chu Thawhṭanni khan Camden, London-a Music Walk of Fame-ah lak luh an ni.

Band star, Ali Campbell chuan chawimawina hlan an ni chu ropui a tih thu leh, Camden-a an band perform laite a ngaihtuah chhuak tih a sawi a, he hmuna an perform hian khawvel hriata an lar chhohna kawngah nasa takin a pui a ni, a ti. Artist special tak tak zinga hriat an hlawh ve chu an group tan thil lawmawm tak a nih thu a sawi bawk.

Music Walk of Fame-ah hian September 4-9 inkarah artist 11 lak luh an ni dawn a, UB40 bakah Janis Joplin, Harvey Goldsmith, Gordon Mac, DJ Paul Trouble Anderson, The Sugarhill Gang, Eddy Grant, Buzzcoks, The Kinks, Billy Bragg leh Shalamar-te a ni. September 9 hian Camden Music Festival hawn a ni bawk ang.

English reggae leh pop band, UB40 hi kum 1978, December thla khan Birmingham, England-ah din a ni a, UK Singles Chart-ah an hla 50 chuang zet an lanpui. An hit zinga mi, 'Red Red Wine' leh '(I Can't Help) Falling In Love With You' te chu Mizoram-ah pawh kan hre lar hle. Khawvel huap pawhin hlawhtlinna an chang a, Grammy Award for Best Reggae Album-ah vawi 4 nominate ni tawhin, kum 1984 khan Brit Award-ah Best British Group-ah nominate an ni bawk. An record-te hi mtd 70 chuang an hralh.