Khiangte Construction Ṭhazual Lengzem : Lengzem-a hma hruaitu Zaii Hauchhum

Khiangte Construction Ṭhazual Lengzem chart tharah rin lawk ang ngeiin Zaii Hauchhum chuan a hla, 'Kar hla ṭhin mahse' tih chu no. 1-ah a rawn lanpui e.

A zaithiam baka performer ṭha leh hmuhnawm em em, Zaii Hauchhum hi Mizo lengzem artist hmeichhe huhang ngah ber zinga mi a ni a, a music video-te hi a ngaihnawmin a hmuhnawm hle zel.

'Kar hla ṭhin mahse ' hi Zaii Hauchhum phuah niin July 14-a a tihchhuah a ni a,music producer hi Eric Renza niin recording pawh a kutchhuak a ni a, bassist hi Rema niin video hi Bilywaif Films siamsak a ni thung.

Mizo Idol intihsiakna aṭanga rawn invawrhchhuak, Angela Malsawmpari pawhin 'Hnemtu ngai' tih chu hma rawn sawnpui zelin pahnihnaah a rawn chho ta. Chart hmasa lama pakhatna, David Darlong chuan a hla thar, 'Lo kir hram rawh' tih chu pathumna a rawn nihpui leh thei bawk.

Marina Vanhriatpuii Varte leh Saka-te pawhin hma lam an pan zel a, top 5-ah an lang e.

Ṭhazual Lengzem top 10-ah Siampuii Ralte, Eddie Pachuau leh Manuna te an la lang chhunzawm zel a, hetih lai hian lang thar pahnih an awm. R. Laithangpuii leh hun rei tak a thawm a reh hnua music video tichhuak thar, Mizo Idol 2022 T. Vanlalhmangaihi te an rawn lang ve bawk a ni.