'Aquaman And The Lost Kingdom' teaser tichhuak

Warner Bros chuan December thlaa tlangzarh tur, ''Aquaman And The Lost Kingdom' teaser chu Pathianni khan a tichhuak a, full trailer hi September 14-ah a tichhuak leh ang.

Teaser-ah hian Jason Momoa chu Arthur Curry a.k,a. Aquaman ah kan hmu leh a, Patrick Wilson chu Arthur half-brother Orm Marius leh, Yahya Abdul-mateen II chu David Kane a.ka. Black Manta a rawn ni leh.

Official synopsis chuan, 'A ṭum khatnaah Aquaman a hneh theih loh hnuah, Black Manta chuan a pa thihna phuba lak ngei a la tum tlat a, Aquaman hneh leh tichhe turin engmahin a dal dawn lo. Tun ṭumah hian Black Manta chuan a hma ai zawngin theihna a ngah tawh a, Black Trident power hmangin chhiatna nasa tak a thlen thei dawn a ni. Ani hneh tur hian Aquaman chuan a unaupa tang mek, Atlantis lal hlui, Orm chu a chhuah a, a thurualpui a ngai ang. An pahnih hian an inkar boruak ṭha lo leh inngeih lohna te dah ṭha a, an lal ram leh Aquaman chhungkua venghim a, khawvel chhe vek tur veng tura an thawh dun a ngai dawn a ni," tiin a tarlang.

Hun rei tak thawm an neih loh avangin Warner Bros hian 'Aquaman' sequel hi an tawp san ta nia report pawh a awm hman a, social media lamah pawh fan ṭhenkhatte an ṭawng zui hman a ni. 'Aquaman 2' hi James Wan direct niin, script writer hi David Leslie Johnson-McGoldrick a ni a, December 20 hian US-ah tlangzarh a ni ang.