Box Office-ah ‘The Nun II’ a hrang

North American box office-ah horror film thar, 'The Nun II' a rawn hrang na hle a, 'The Equalizer 3' um chhuakin no. 1 dinhmun a rawn hauh nghal.

Hollywood actor leh writer-te'n nawrh an huaihawt mek avangin an film pawh an promote thei lo a, hemi chunga 'The Conjuring' franchise tlangzarh hi box office lamah a che ṭha hle a, tlangzarh karah USD mtd 32.6 a la lut thei. Review lam erawh a hmu ṭha lem lo a, Rotten Tomotoes-ah 46% chauh a hmu pha a, CinemaScore chuan average grade 'C+' a pe a, F scale-ah A+ a pe.

'The Nun II' hi a hma lama film-te aiin a hlauhawm zawk niin an sawi. 'The Conjuring' franchise ninth installment niin, 'The Nun' hmasa zawk tihchhuah aṭanga kum nga hnuah an siam ve leh a ni. "The Conjuring" hi horror franchise-ah khawvel huapa sum la lut hnem ber niin USD tld 2 chuang a la lut pha a ni.

'The Equalizer 3' chu no. 2-ah tla thlain, a kar hnihnaah hian USD mtd 12.1 a la lut. Film chhuak thar dang, 'My Big Fat Greek Wedding 3' chu no. 3-ah rawn langin, a film hmasa zawk tihchhuah aṭanga kum 21 hnuah an siam ve leh chauh a ni.

Bollywood superstar Shah Rukh Khan channa, Indian revenge thriller 'Jawan' chu no. 4-a rawn lang pha a, USD mtd 6.2 a la lut. 'Barbie' chuan USD mtd 5.9 lak luh belh lehin, Top 5 a rawn khar.