Milan-ah Escape Engmoia collection-in hlut a hlawh

Italy, Milan khawpuia kar liam ta Inrinni zana North East India Festival neihnaa fashion show buatsaiha tel, Mizo designer Escape engmoia kutchhuak chuan lawm leh ngaihhlut a hlawh hle.

North East Institute of Fashion Technology (NEIFT) leh Consulate General of India, Milan huaihawtin Milan historical venue, Villa Necchi Campiglio-ah festival hi neih a ni. India leh Italy sorkara mi pawimawh tak takin an hmanpui a ni.

Fashion captial of the world tia sawi, Milan-a festival-a fashion show buatsaihah hian designer pariat thlan zingah Escape Engmoia hi a tel a, a kutchhuakte hi Milan fashion industry-a top international model, Milan fashion week leh New York fashion week-a lo walk ṭhin tawhte'n an rawn pho chhuak a ni.

Escape Engmoia chuan a beisei phak baka a collection-te an lo hlut thu sawiin, a tam zawk chu a hralh nghal thu Vanglaini a hrilh. Tailoring piece leh handmade-te chu an lo hlut hle tih a sawi a, website ṭhenkhat pawhin tie-up puiah sawmin agreement-te pawh a siampui nghal bawk. Mizo fashion industry tan pawh bung thar kaipui ngei a inbeisei thu a sawi.