Talk show chhunzawm tum Drew Barrymore-in sawisel tawk

Hollywood actor leh writer-te'n nawrh an huaihawt mek karah Drew Barrymore chuan a talk show season lina chhunzawm a tum a, hei vang hian sawisel a tawh phah nasa hle.

Barrymore hian a instagram-ah a chat show lar tak, The Drew Barrymore Show season lina chu September 18 aṭangin tihchhuah leh a ni dawn tih a puang a ni. Hemi rual hian a show chhunzawm tur chu nawrh huaihawt mek, Writers Guild of America leh SAG-AFTRA nena inhriatthiamna neia tihchhuah a ni dawn tih a sawi bawk.

Mahse mi tam takin sawiselin, pawl thutlukna ang zawm ve duh loahte an puh a, Writers Guild of America, East, chuan a show neih tur chu lo dante an tum nia sawi a ni. A thutlukna lo siam tawh chu ngaihtuah ṭha leh turin an ngen bawk a ni.