Lelte Team-in Manipur Zofate ṭanpuina hlan

Lelte Award Executive Committee chuan August thlaa Manipur Zofate puala zan hnih concert an siam leh, Aizawl khawpuia Mt. Carmel School nena street donation an siam hmanga an sum hmuhte chu Manipur-ah kalin an hlan. An sum hmuh hi Rs. nuai 18 chuang a tling a ni.

Lelte Team hian September 7-9 khan Manipur hi tlawhin, Manipur Mizo hnam aiawha ding thar, Mizo Village Volunteer (MVV) leh Group YMA hnenah ṭanpuina sum hi an hlan a ni. Mizo hnam aiawh hruaitute'n an lo dawngsawng ṭha hle tih an sawi. MVV passing out parade hmanpuiin thilpekte an sem nghal bawk.

Manipur tlawha kal Lelte Team hi Lalnunkunga Sailo (Chairman), C. Dinthanga ( Chief Organiser), Armand Zosangzela,(Secretary), C. Vanlalhruai leh VL Sawma Executive member te-an an ni. Tualchhung buaina chhuak avanga hnam pasalṭha boralte puala siam, Wall of Remembrance pawh an tlawh bawk a ni.